Karurkar
Monday 12 October 2020
पितृशोक
Friday 7 February 2020
निरामय_आरोग्यवर्धिनी - ४जिम किंवा खेळ (gym vs sports)
हा विषय जरा आश्चर्यचकित करणारा आहे. परंतु या घडीला त्याचे खुप विशेष महत्व आहे. कारण आपण आता आरोग्यात कृतीशील बदल घडवणार आहोत. बऱ्याच संकल्पांची बंधन स्वतःला, जीवनशैलीला (lifestyle) घालणार आहोत. आपण आरोग्याचे तिन भाग केले व त्यात मानसिक आरोग्यास प्रथम स्थान दिले. कारण मानसिक आरोग्य नसेल तर जिम मधे कसरत करुन कमावलेली शारिरीक शक्ती ही निस्तेज, दिशाहीन व अस्थिर असते. जिममधे तुम्ही तुमचे मसल्स बनवु शकता परंतु रिफ्लेक्सेस (reflex, प्रतिक्षिप्त क्रिया) सुधारु शकत नाही. Reflexes म्हणजे तुमच्या मेंदुकडुन प्रत्येक बाह्य घटनेसाठी दिली जाणारी प्रतिक्रिया, त्यासाठी शरीराला दिली जाणारी आज्ञा आणि शरीराची त्या आज्ञेनुसार हालचाल. उदा: तुमच्या डोळ्यात कोणी बोट घातले तर लगेच तुमची पापणी बंद होते. किंवा तुमच्या दिशेने कोणी चेंडु फेकला तर तो तुम्ही झेलण्यासाठी जी हालचाल व तत्परता दाखवतात त्याला रिफ्लेक्सेस म्हणतात. अशा सगळ्या रिफ्लेक्सेस वर दोनच गोष्टी काम करतात. एक योग व दुसरे म्हणजे खेळ. योगात डेव्हलप होणारी शरीराची तत्परता ही अचाट व सर्वोत्कृष्ट असते. कारण योगशिक्षा नुसते इंद्रीयांचेच नाही तर मनाचे नियमन करुन तुम्हाला एकचित्त होण्याचा सराव देते. तिथे लवचिक शरीर हा त्या नियंत्रणाचेच एक अंग म्हणुन आसनांचा सराव केला जातो. त्यामुळे कराटे, ताय-ची, काठी, तलवार चालवण्याचे अनेक खेळ यांत ध्यान, एकाग्रता यांना महत्व आहे. शरीराच्या मसल्स पेक्षा रिफ्लेक्सेस महत्वाचे. त्यामुळे तुमचे शरीर चपळ तल्लख व तत्पर राहते. प्रत्येक अवयव हा मेंदुकडुन येणारी आज्ञा झेलतो. तिथे तो तक्रार करत नाही की माझा हात पोहोचत नाही किंवा पाठ, मान वाकत नाही. जिथे कमकुवत शरीर असते तिथे हा प्रश्न येतो. जिथे मेंदुची आज्ञा वाहणारे न्युरॉन्स ढील्ले पडतात तिथे रिफ्लेक्स अजुन कमकुवत आढळतात. तुमची खेळातली गती रिफ्लेक्सेस सुधरण्यास मदत करते. उदाहरणाखातर बँटमेंटन खेळ घ्या. त्यात तुमच्या हाताची खांद्याची डोळ्याची व त्यासोबत न लक्ष देता पायांची समन्वयीत हालचाल होते. व तुम्ही शटल प्रतिस्पर्धीच्या दिशेने मारतात. तसेच स्विमिंग, तायक्वांदो, टेनिस, कबड्डी, खो खो, इतर असंख्य खेळात ही समन्वयीत हालचाल तुमच्या रिफ्लेक्सेस मधे प्रचंड सुधारणा करते. खेळ खेळतांना तुमचा उत्साह हा जास्त असतो कारण तिथे मजा येते. प्रतिस्पर्धी असतो. खेळीमेळीचे वातावरण असते. मैत्री वाढते. तुमच्या मानसिक आरोग्याला हातभार लागतो. खेळात होणाऱ्या हालचाली काही उपकरणं जीममधे हुबेहुब करतात. उदाहरणार्थ रोव्हींग (नाव वल्हवणे) मशीन. परंतु त्यात तुम्हाला फक्त ते मसल्स विकसीत करण्यात मदत देतील. तिथे तेवढे चैतन्य लागणार नाही. जे खरी नाव वल्हवण्याच्या शर्यतीत तुम्हाला मिळेल. स्पर्धात्मक वातावरण तर जिममधील रोव्हींगमधे अजिबात नसणार. खिलाडु वृत्ती विकसीत होण्यामागे स्पोर्टसमधे असलेले अनेक महत्वाची गुण आहेत. ते जिममधे मिळणे शक्य नाही. परंतु जिम वाईट आहे असे नाही. ज्यांना त्यातुन प्रेरणा मिळते त्यांनी तो अवश्य करावा. मात्र जिममधुन कसलेल्या शरीराची एखाद्या खेळात/स्पोर्ट्समधे सहभाग घेऊन समिक्षा करावी. स्पोर्ट्स तुमच्या शरीराला शक्ती व लवचिकता यासोबत समन्वय देखील देतो. एका स्पोर्ट्समधे होणाऱ्या हालचाली बऱ्याच प्रकारच्या असल्यामुळे त्या जिममधे हुबेहुब करणे जवळपास अशक्य असते. तसेच तुमची सांघिक (team games) खेळ खेळल्यामुळे इतरांशी होणारे संभाषण, इतरांना कसा सपोर्ट करायचा, पार्टनरचे दोष कव्हर कसे करायचे हे शिकवते. हे आयुष्यात फार महत्वाचे आहे. स्पोर्ट्स किंवा मिलीट्री मधुन रिटायर होणारे लोक यांचा जगण्याचा दृष्टीकोन इतर लोकांपासुन वेगळा असतो. दोघांची सहनशक्ती तसेच लढाईत टिकुन राहण्याचा चिवटपणा हा वाखाणण्याजोगा असतो. कुठुन येतो हा गुण? हा स्पोर्टस खेळुनच येतो असे माझे स्पष्ट मत आहे. मिलिट्रीत देखील स्पोर्ट्सला भरपुर प्राधान्य दिले जाते. ही मंडळी कधीही पराजय न मानणारी असतात. शारिरीक मेहनतीसोबत हे गुण स्पोर्ट्समधे मिळत असतील तर प्रत्येकाने स्पोर्टस का करु नये? विचार कराल? तुम्हाला नुसते मसल्स हवेत का तुम्हाला त्यासोबत, endurance( सहनशक्ति), never say die spirit( पराजयातुन जय प्राप्त करण्याची स्फूर्ति), भागीदारी (partnership), चिवटपणा, खिलाडुवृत्ती हे गुण देखील हवे आहेत?
जिम हा concept कदाचित स्पोर्ट्स खेळणाऱ्या लोकांना मदत व्हावी म्हणुन निर्माण झाला असावा. कदाचित त्याचे काही इतर फायदे असतील. परंतु आपल्याला यथाशक्ती खेळामधे भाग घेऊन त्याचा आरोग्यास समग्र फायदा करुन घ्यायचा आहे.
शेवटी लेख संपवतांना तुम्हाला खेळांचा अजुन एक फायदा सांगतो. तुम्ही विचार करा की तुमच्या जोडीदाराबरोबर किंवा तुमच्या अपत्याबरोबर बॅडमिंटन किंवा टेनिस खेळत आहात. ह्या वेळेचा तुमच्या नात्यावर किती महत्वाचा व चांगला परिणाम होईल? तुमची एकमेकांना मदत तर होईलच परंतु ह्या आरोग्याच्या प्रयोगात तुम्ही कुटुंबाची वीण घट्ट कराल. बालपणीचे मित्रमैत्रीण यांच्याबद्दल एक विशेष जिव्हाळा, आपुलकी, प्रेम असण्यामागे एक कारण हे ही असते की ती खेळात जुळलेली नाती असतात. तुमचे ते खेळगडी, पार्टनर असतात. आपले दुःख, चिंता स्पोर्ट्स खेळतांना विसरणे जितके सोपे व सहज आहे तितके सहज ते जिममधे वजनं उचलतांना होणे सोप्पे नाही. काही लोकांना जिम करतांना हे शक्य होत असेलही. पण दोघांमधे बरीच तफावत तुम्हाला जाणवेल.
गृहपाठ:
- कुठल्याही खेळासाठी योग्य तयारी (शुज, योग्य पेहराव, गुढघ्याची कॅप, घोट्याची कॅप) तसेच खेळापुर्वी warmup शिकुन तो अवश्य करा. आवश्यक असल्यास ट्रेनिंग.
- तुमचे आवडते खेळ आठवा त्याची नोंद करा.
- तुमच्या घराजवळ कुठे स्पोर्ट्स ॲक्टिविटी होतात ते शोधा.
- जिथे कोचिंग लावता येईल तिथे कोचिंग जिथे जोडीदाराबरोबर किंवा अपत्यांबरोबर गेम खेळता येतील तिथे तसा प्लान आखा.
- कुठल्याही गोष्टीची लाज बाळगु नका. मुलांना समजा ताईक्वांदो किंवा बॅडमिंटन क्लास लावला असेल तर त्या कोचला विचारा. तुम्हालाही शिकायचे आहे म्हणा. पाठपुरावा करा जेणेकरुन तुम्हाला शिकवायला ते तयार होतील.
- आठवड्यातून एक दिवस मित्रांना भेटून चहापित गप्पा करण्यापेक्षा कुठला मैदानी खेळ खेळता येतो का पहा?
- ज्यांना माऊंटेनियरींग करावे वाटते त्यांनी किल्ले चढण्यापासुन सुरवात करा. ३ महिन्यात ३ किल्ले ठरवा.
- स्वीमिंग करता येईल त्यांनी जरुर हा क्लास करावा. त्यात गुढघ्यांना त्रास न होता छान व्यायाम होतो.
- मित्रांसोबत किंवा जोडीदाराबरोबर विकेंडला बॅडमिंटन कोर्ट बुक करुन खेळा. टिम तयार करता आली तर पहा.
वरील गृहपाठ केल्यावर आपण पुढील आरोग्यविषयक ठोस पाऊल उचलणार आहोत.
वरील गृहपाठाचा आपण आपल्या दिनचर्येत तसेच आरोग्य बदलण्याच्या प्रक्रियेत उपयोग करुन घेणार आहोत.
#निरामय_आरोग्यवर्धिनी
आरोग्यवर्धिनी सेवक
© राहुल करुरकर